Արսեն Վենգերը ծնվել է 1949թվ.-ի հոկտեմբերի 22-ին ֆրանսիական Ստրասբուրգ քաղաքում: Խաղացել է «Մյուտզինգ» և «Մյուկխաուզ» ակումբներում: 1978-1981թվ.-ին հանդես է եկել «Ստրասբուրգ» պրոֆեսիոնալ ակումբում: 1978/79 մրցաշրջանում դարձել է Ֆրանսիայի չեմպիոն:

Մարզչական կարիերա:

1981 - «Ստրասբուրգի» երիտասարդական թիմի երկրորդ մարզիչ

1982-1983 - «Կաննի» գլխավոր մարզչի օգնական

1984-1987 - ֆրանսիական «Նանսի» ակումբի գլխավոր մարզիչ

1987-1994 - «Մոնակոյի» գլխավոր մարզիչ

1994-1996 - ճապոնական «Գրամպուս Էյթ» ակումբի գլխավոր մարզիչ

1996 - առ այսօր «Արսենալի» գլխավոր մարզիչ

1996թվ.-ի սեպտեմբերի 30-ին Վենգերը նշանակվում է «Արսենալի» գլխավոր մարզիչ: Վենգերի գլխավորությամբ առաջին խաղում կանոնիրները 2:0  հաշվով պարտության են մատնում «Բլեքբեռնին»:

Արսեն Վենգերի գլխավորությամբ «Արսենալը» դարձել է Անգլիայի չեմպիոն (մրց. 1997/98, 2001/02, 2003/04), Անգլիայի գավաթակիր (մրց. 1997/98, 2001/02, 2002/03, 2004/05), Անգլիայի սուպերգավաթակիր (մրց. 1998/99, 1999/00, 2002/03, 2004/05), Չեմպիոնների լիգայի եզրափակչի մասնակից (մրց. 2005/06), ՈՒԵՖԱ-ի գավաթի եզրափակչի մասնակից (մրց. 1999/00):

Ոչ մի մարզչի չի հաջողվել այդքան երկար մարզել «Արսենալը» և հասնել այդպիսի հաջողությունների: Արսեն Վենգերը, գլխավորելով «Արսենալը», հավաքել է մասնագետների խումբ, որն հատուկ ուշադրություն է դարձնում ֆուտբոլիսնտերի ֆունկցիոնալ պատրաստվածության վրա:

Վենգերը ամբողջ աշխարհում հայտնի է նաև երիտասարդ տաղանդներ գտնելու և աստղեր դարձնելու ունակությամբ: Անգլիայում նրան «Պրոֆեսոր» են անվանում: Առաջին օտարերկյա մարզիչն է, ում հաջողվել է մեկ մրցաշրջանում հաղթել առաջնությունում և դառնալ գավաթակիր: Առաջին օտարերկյա մարզիչն է, որ արժանացել է տարվա մարզիչ կոչմանը:

2001թվ.-ին Վենգերը մերժել է Ֆրանսիայի ֆուտբոլի ֆեդերացիային և չի ցանկացել հեռանալ «Արսենալից»: Մեծ վտսահություն ունի երկրպագուների շրջանում, այդ իսկ պատճառով էլ տարածված է «Արսենը գիտի» արտահայտությունը: